اصحي يا دنيا
وقومي يا دنيا
واسمعي ديك الصبح صديقك
خدي م الكزرونة الألامونية
لبن الصبح وغيري ريقك
اصحي يا دنيا
وقومي يا دنيا
والبسي واتزوقي تزاويقك
وامشي ورشي علينا كولونيا
وخدينا معاكي ف طريقك
لما الصبح بيفرش نوره
يصحوا ولاد الأرض يدوروا
والنمل يحاذي في طابوره
ويعبي ويشيل ف سحوره
والموج يتمطع ف بحوره
والبوبي يعضعض ف فطوره
والنحل يدور وسط زهوره
واسقيه يا زهور من تفاريحك
فرش النور ع الأرض وغطى
بطبوط كاكا لمامته البطة
من أول ندهة قامت ناطة
وبسرعة حضرت الشنطة
باس مامته ع العتبة وخطى
شاف القطة فوق البسطة
هتنونو له جاتها زغطة
قال اشربي وانتي يروح ضيقك
سوا سوا رايحين على مدارسنا
حاضنين ف كتبنا وكراريسنا
على آخر السلم بسبسنا
جالنا البوبي عليه ملسنا
ومشينا بغنوة تونسنا
وتنشطنا وتحمسنا
في الفصل فتحنا اتشمسنا
وسمعنا يا عصافير زقازيقك
اصحي يا دنيا
وقومي يا دنيا
واسمعي ديك الصبح صديقك
خدي م الكزرونة الألامونية
لبن الصبح وغيري ريقك
اصحي يا دنيا
وقومي يا دنيا
والبسي واتزوقي تزاويقك
وامشي ورشي علينا كولونيا
وخدينا معاكي ف طريقك