ضل الضحى الرامي ..
وشمس شتوية دفاية ..
وريحة البن ، لما يفوح في قلاية..
وفروة جدي .
وسبحة جدي لمن جيت أمد يدي
(جدي.. أديني تعريفة )..
(بتقرا الحمدو يا المبروك )..
(بقرها وشان تعريفه القاه)..
بجود في القراية كمان ..
منك يا يمة والله زمان يا يمة .. !
وسبحة ( بنت الفكي)
والطورية .. والواسوق..
وسعف حبوبة ، والحنقوق
وصوت ( سعدية ) بت جيرانا ...
تشحد ليها في طايوق.
وصوت (عرفه) لما تخمج الدلوكة غناية...
الصور جوايا محفورة
الصور محفورة جوايا.
ولي الليلة ، ولي وبعد باكر..
شان الزمن غدار وما معروف..
زمن مكار ،
زمانا كلو خوف في خوف
بدور أجيك يايمه ضاقت بيا يا يمه هنا
بشتاق يايمه لي ملاح النعيمية..
وريحة صاجك المحروق
ولما تسوي طعمية
وغباشة روب ،
وعنزة حلوب
بدور أجيك أتمسى بعيونك
وأصابحك يا حبيبتي أنا
اتاري الدنيا من دونك...
شينة ومرة وحارة زي النار..
ولو دورتي احكيلك عن حالي في البندر ،
أبدا بس من وين ؟؟
ما شيتا غريب وعجيب
ده شيتا كلو شين في شين
هنا الزول العديل ونصيح
وحاتك انت يا الغالية
بعيش حياتو...
بي وشين..
وزولتي الحتي حبيتها . يما وكان شفتي يا
لقيتها بلاي ، تحب زولين.. .
يا يمه والله زمان وأيه !!