دگ هاونك يا حزن ... واسحن بگايا الحيل
ثلاثين عام وحمد ... لا مر ولا اجه الريل
دگ هاونك يا حزن
خليني اسمعك ترن
مامش بعد كل رجه ... يوصل قطار الليل
دگ هاونك يا حزن ... واسحن بگايا الحيل
حزنن ليالي الفرح ... والدمعه هلهوله
وخزّامه صار الصبر ... والمستحه سوله
شطولك يا ليل الصبر
تجرح ايام العمر
جزنه وبعدنه بأمل ... يوصل قطار الليل
دگ هاونك يا حزن ... واسحن بگايا الحيل
للّيل لسعة شمس ... والشمس بردانه
والروح نخله بجرح ... من اسنين عريانه
وينه الينشف الدمع ... ؟
ويسمع الماينسمع ... ؟
غص الگلب بالصبر ... شنصبر بعد يا ليل ... ؟
دگ هاونك يا حزن ... واسحن بگايا الحيل
كلما يزيد القهر ... للفرح دكّت باب
وكلما يكون العتب ، خنجر ، نظل احباب
والقصّه قصّة حمد
وريل انگطع للأبد
لكن نظل ابرجه ... يوصل قطار الليل