تلات سلامات يا وحشني تلات أيام
بإيدي سلام .. و عيني سلام .. و قلبي سلام
---
بعادك يا جميل طول .. و ده أول معاد بيطول
تلات أيام يا روح قلبي .. و انا جمبي حسود و عزول
يقسوني عليك مقساه .. ينسوني هواك منساه
يا مالي الدنيا في عينيا
تلات سلامات وشويه .. تلات سلامات
عرفت الوحده ايه هي .. و ايه ايامي في بعادك
و شوفتك هانت الدنيا .. ولا فكرت في عتابك
و اعاتبك ليه و انا بحبك .. و اقولك ايه و انا بحبك
يا مالي الدنيا في عينيا
تلات سلامات و شويه .. تلات سلامات
---
عيونك سود و اقول مش سود عشان الناس تتوه عنك
و اصونك من عزول و حسود .. و اغير حتى عليك منك
و لو قلبك سأل قلبي .. ح يعرف اد ايه حبي
يا مالي الدنيا في عينيا
تلات سلامات و شويه .. تلات سلامات
تلات سلامات يا وحشني تلات أيام
بإيدي سلام .. و عيني سلام .. و قلبي سلام