حطوها في كفان بنت عظيم الشان زادتني حمان من دخل حجايا
داروها في النعاش مصبوغة الارماش راني وليت باص واش اللي بيا
جابوها في جحاف حومتها تنظاف زينة الأوصاف سبتي طويلة الرايا
حومتها بالحرير كمخة فوق سرير وانا نشبر مهلكتني حيزيا
ياحفار القبور سايس ريم القور لا تطيحش الصخورعلى اللي بيا
حشمتك بالكتاب و حروف الوهاب لا تطيح التراب فوق أم مرايا
لوان تجي للعناد ننطح تلث عقاد نديها بالزناد عن قوم العديا
واذا نحلف و راس مصبوغة الأنعاس ما نحسبشي الناس لو تجي ميا
لوا أن تجي للذراع نحلف ما تمشي ذراع ننطح صرصور قاع باسم حيزيا
لو أن تجي للنقار نسمع كان و صار لن نديها قمار و الشهود عليا
لو أن تجي للزحام نفتن عنها اعوام نديها بالدوام نابو سهميا
كي عاد أمر الحنين رب العالمين لا لقيت لها من اين نقلب حيا
صبري صبري عليك نصبر أن ناتيك نتفكر فيك يا ختي غير انتيا
هلكني يا ملاح الأزرق كي يتلاح بعد اختي غي زياد يحيا في الدنيا
عودي في ذا التلول رعى كل خيول و اذا والى الهول شاو المشليا
آش لعب في الزمول اعقاب المرحول انا عنه نجول بيا ما بيا
بعد شهر ما يدوم عندي ذا الملجوم نهار ثلاثين يوم وراء حيزيا
صدوا صد الوداع و اختي قاع طاح من يدي سراح الازرق آه ديا
نبكي بكي الفراق كبكي العشاق زادت قلبي حراق خوضت مايا
الشمس الى ضوات طلعت و تمسات سخفت بعد أن سوات وقت الضحويا
هذا درتو مثيل عن رايسة الجيل بنت احمد صيل شايعة ذواديا
تسوى ميتين عود من خيل الجويد و مية فرس زيد غير الركبيا
تسوى من الابل عشر ماية مثيل تسوى غابة النخيل عند الزابيا
تسوى خط الجريد قريب و بعيد تسوى بر العبيد حاوسا بالفيا
تسوى مال النجوع و الذهب المصنوع تسوى نخل الدروع عند الشاويا
تسوى اللي في البحوروالبادي وحضور اعقب جبل عمور و اصفا غردايا
تسوى تسوى مزاب و سواحل الزاب حاشا ناس القباب خاطي انا الوليا
ثلاثة و عشرين عام في عمر أم حرام منها راح الغرام ما عاد شي يحيا
عزوني يا صغار في عارم الاوكار ما خلات غير دار عادت مسميا
عزوني يا رجال في صافي الخلخال داروا عنها حيال للساع مبنيا
عزوني يا حباب فيها فرس دياب ما ركبوها ركاب من غير انايا