ما خطرتش على بالك يوم تسأل عنى
وعينيا مجافيها النوم .... يا مسهرنى
ده انا قلبى بيسألنى
ايه غير أحواله
ويقول لى بقى يعنى
ما خطرتش على باله
أمال غلاوة حبك فين
وفين حنان قلبه عليا
وفين حلاوة قربك فين
فين الوداد والحنية
يا ناسينى وانت على بالى
وخيالك ما يفارق عينى
ريحنى واعطف على حالى
وارحمنى من كتر ظنونى
لا عينيا بيهواها النوم
ولا باخطر على بالك يوم...
تسأل عنى ..... يا مسهرنى
اسأل عن اللى يقضى الليل
بين الأمل وبين الفكرة
يصبر القلب المجروح
ويقول له نتقابل بكره
وبكره يفوت .. وبعده يفوت
ولا كلمة .. ولا مرسال
وهو العمر فيه كام يوم
وانا بعدك عليا طال
يا ناسينى .. وانت على بالى
وخيالك ما يفارق عينى
ريحنى واعطف على حالى
وارحمنى من كتر ظنونى
لا عينيا بيهواها النوم
ولا باخطر على بالك يوم
تسأل عنى ... يا مسهرنى
يا مسهر النوم فى عينيا
سهرت افكارى وياك
الصبر ده مش بايديا
والشوق واخدنى لبحر هواك
أقول لروحى وانا ذنبى ايه
يقول لى قلبلى حلمك عليه
مسيره بكره يعطف علينا
ونبقى نعرف هجرنا ليه
تعال خلى نسيم الليل
على جناح الشوق يسرى
الهجر طال والصبر قليل
والعمر أيامه بتجرى
طالت الأيام ... تعال لى اوام
ده انا عندى كلام بدى أقولهولك
انا عندى كلام وفى قلبى هيام أوصفهولك
ونعيش أيام ولا فى الأحلام
يا ناسينى وانت على بالى
ارحمنى من قسوة قلبك
ريحنى واعطف على حالى
خلينى أتهنى بقربك
ولا عينى بيهواها النوم
ولا أشكى ولا اقول لك يوم ... اسأل عنى
يا مسهرنى