ياخليفهْ أو إذا قلنا سمانا
وذاتهْ المَعْنَى سمانا أَوْ خليفهْ
يارجانا ويارجا منهو رجانا
وسورْ ديرتنا م الأيامْ المِخيفهْ
لو يميلْ الدهرْ سيفهْ في حمانا
تِذبَحَهْ يا سيّدْ الدنيا بسِيفهْ
لكْ فدا بأرواحنا وغالي دمانا
وبالقلوبْ المخلصهْ ولأجلكْ نظيفهْ
إنت حلمْ المجدْ نلنا بكْ مِنانا
جيتْ غايةْ مطلبهْ وع كيفْ كيفهْ
ماترفرفْ رايةْ أمجادْ بسمانا
إلّا مرفوعهْ بيمناكْ الشريفِهْ
ماحد مثلكْ من الحكام جانا
غيرْ أبوك وإنتْ عَ العليا رديفهْ
ياسليلْ المرجلهْ وياطَعْم مانا
صاحبْ الأخلاقْ والنفسْ العفِيفهْ
سيرتكْ مثلْ الذهبْ منها الزمانا
يضربْ الأمثالْ ويوَصفْ وصيفهْ
لي يديفْ العطرْ كانْ فْ يومْ حانا
ومالجي طيبٍ لجأ لأسمكْ يديفِهْ
منْ حكمتْ الهَمْ ماهمْ وعنانا
كيفْ وإنتِهْ قاطْعِنهْ مِ النصيفهْ
كِلْ زينٍ طابْ في عهدكْ وزانا
وكلْ شينٍ حاينْ وينزفْ نزيفهْ
وصارتْ الحاجه واهلها بخبْر كانا
غيرْ لي محرومْ وحظوظهْ ضعيفهْ
الشفا بك طابْ يامنْ بكْ شفانا
ومرتْ الوعكهْ وبإذنْ الله خفيفهْ
بك نطَمنْ شعبنا ومنهونصانا
والفرَحْ عمْ الوطنْ وأمسىَ وليفهْ
وهاالسنهْ عيدينْ بيعَيدْ حمانا
وأكبَرْ العيدين شيخْ أسمهْ خليفهْ