باحبِّك.. قدّ عيدان قصب غيطنا
دقيقنا وبيضنا أو قِيضنا
باحبِّك.. قد خُف جمَلْنا ما يحمّلْ
وعَرَق أنفار هتتغدّا وترجع تاني وتكمّلْ
قدّ الزرْعة
قدّ اللسعة وأنا قاعد في ليلة برد عاتدفّا
باحبِّك وإنتي حِبّيني لاجْل نسيّر الدفّة
قالولِك عنّي ده أسمرْ
قوليلهم لونُه من طينُه
قالولِك شعره كرْكوتي
قوليلهم وارثُه عن طينه
قالولِك عني مستعجل
قوليلهم ناسُه وارطينُه
قالولك لَخْمة وباتَهْتِهْ
قوليلهم عِلّة.. ولا حدِّش
هايِخلا مِ العِلل طينُه
قالولِك أبوه ياما اتجوّز
قوليلهم مالُه.. مش مالي
وأنا مالي!
مدام مالي عيون الناس
ومالي عيون نَسَاوِينُه
قالولِك ياما هيسافر
ولا يسيبلِك عناوينُه
قوليلهم صورتي منحوتة
في قلبُه وعينُه وجبينُه
قالولِك إيه دليل حبُّه؟
قوليلهم اقروا دواوينُه!
قالولِك ياما ساب قبلِك
قوليلهم ده انتو ظالمينُه
يا ريتكم زيّي عارفينُه
ده ساب الدنيا فوق رمشي
سيبوني أعوّضُه سنينُه