واحنا صغيرين
الشمس هى هى
والقمر هوا هوا
بس كانوا منورين
واحنا صغيرين
الليالى مبسمة
كنا طايلين السما
مع ان ايدينا كانو
ياحبيبى قصيرين
فى براءة ايامنا الاولى
وبكل سهولة نرسم ع الارض
باحلامنا ونلعلب اولى
نتشاقى واحنا بمرايل
نتشعبط ع الشجر المايل
يجى الليل والجدة بتحكى
نصبح م الحكايات طايرين
واحنا صغيرين
وتعدى الحلوة ام ضفيرة
تملانا الحيرة
نخبى عن بعض عيونا وندارى الغيرة
اللى بيحلمها ف احضانه
واللى هياخدها على حصانه
ويعدى العمر علينا ونلقى
ايدينا فى السراب ماسكين
واحنا صغيرين