في العالم العربي تعيش
كما قط ساكن تحت عربية
عينيه ما تشوفش من الدنيا دي حاجة إلا الجزم
في العالم العربي تعيش
مباراة بقالها ألف عام
لعيبه تجري يمين شمال و الكورة طول الوقت في ادين الحكم
في العالم العربي تقل للبنت حبيتك
و تبقى البنت بتحبك و بتموت فيك تناولك بالقلم
في العالم العربي تعيش
تشتم في طعم المية و الطعمية و القهوة و روادها
و في مراتك و أولادها و حر و زحمة الأوتوبيس
و في اللي بيعملو ابليس و في التفليس
و لو سألوك تقول الحمد لله
ربنا يديمها نعمة
في العالم العربي تعيش
كما دمعة في عيون الكريم المحنة تطردها يرجعها الكرم
في العالم العربي تعيش
تلميذ في حوش المدرسة من غير فطار
عينه على الشارع و بيحيي العلم
في العالم العربي تعيش
بتبص في الساعة وخايف نشرة الأخبار تفوت علشان تشوف
على الشاشة ناس في العالم العربي تموت